رات دن اُنﷺ کے کرم کے گیت ہم گاتے رہے

بے طلب بخشش ہوئی، ہم بےسبب پاتے رہے

********

اپنی بداعمالیوں پر، ہم تو شرماتے رہے

اور کرم پر ہی کرم سرکارﷺ فرماتے رہے

********

یہ کرم بھی بارہا، سرکارﷺ فرماتے رہے

نعت میں لکھتا رہا، سرکارﷺ لکھواتے رہے

********

صاحبِ معراجﷺ کی نسبت مدینہ بن گئی

ہم تصور میں وہاں آتے رہے جاتے رہے

********

جب سے آغوشِ کرم میں، لے لیا سرکارﷺ نے

جس قدر طوفان اُٹھے، مجھکو راس آتے رہے

********

رات بھر جشنِ چراغاں ہی رہا، اشکوں کی خیر

آپﷺ کی یادوں میں ڈھل کر نور برساتے رہے

********

وہﷺ مِری فریاد سے پہلے، مدد کو آ گئے

اور ہوں گے وہ، جنہیں حالات تڑپاتے رہے

********

اُنﷺ پہ اِتراؤ، کنارے سے لگائیں گے وہیں

ڈوب جاؤ گے، اگر غیروں پہ اِتراتے رہے

********

کچھ نہ تھا مقصود، دیدارِ محمدﷺ کے سوا

اُنﷺ کے دیوانے ہر اک منصب کو ٹھکراتے رہے

********

اُنﷺ کی نسبت نے سرِ ساحل مجھے پہنچا دیا

گو کئی طوفان مِری کشتی سے ٹکراتے ریے

********

رَحمَتہً الِلْعَالَمِیںﷺ کی شانِ رحمت کے نثار

دشمنوں پر بھی کرم سرکارﷺ فرماتے رہے

********

ذکرِ محبوبِ خداﷺ کا فیض ہے اقبال کہ ہم

نعت سے عُشَّاق کی محفل کو مہکاتے رہے

********

صلی اللّٰہ علیہ وآلہ وسلّم